السلام عليكم و رحمة الله و بركاته
الموضوع ده كان نفسي من زمان اتكلم فيه
ليه الناس بتربط بين النقاب و التخلف؟
هل النقاب سبب في تخلف من ترتديه و لا لأ؟
و هل هجوم المجتمع على فكرة تغطية الوجه لحرصه على حرية المرأة و لا الموضوع أكبر من كده؟
بدايةً
في ناس كتير بتختار تغطي وجهها لأسباب مختلفة
الوصف: جراحين و ممرضين
سبب تغطية الوجه: الالتزام بقواعد مكافحة العدوى
نظرة المجتمع: ناس بتقوم بمهمة إنسانية, ربنا يخليهم للبلد
الوصف: سكان شمال الصين
سبب تغطية الوجه: شدة البرد
نظرة المجتمع: عادي هم احرار
الوصف: جنود أمريكان
سبب تغطية الوجه: للحماية من الرمال و الأتربة في المناطق الصحراوية
نظرة المجتمع: أبطال يؤدون واجبهم الوطني
الوصف: ناس يابانيين
سبب تغطية الوجه: للوقاية من الأمراض
نظرة المجتمع: عالم متحضرة
الوصف: امرأة مسلمة
سبب تغطية الوجه: معتقداتها الدينية
نظرة المجتمع: متخلفة, غبية,كيس زبالة,خيمة متحركة
ليه؟؟؟
ليه كل الناس دول احرار في اللي بيعملوه و متحضرين و حلوين
و الست الغلبانة دي الكل بيهاجمها؟؟
ليه حجاب النصرانية و اليهودية مش تخلف و حجاب المسلمة بس هو اللي تخلف و ضد الحرية؟؟
ليه محدش بيطالب الراهبات بكشف شعورهن و التعرض للهواء و الشمس و الانطلاق و الحرية؟
اشمعنى المسلمة؟
يظهر أن المشكلة في عقول الناس
ما بيحبوش أي شئ إسلامي
بس لو نفس الشئ بيعمله حد مش مسلم تبقى حرية شخصية و حاجه حلوة اوي
كاريكاتير يغني عن ألف كلمة
أنا منتقبة أنا حرة في اختياري
أنا أغطي وجهي لسبب زيي زي الناس اللي فوق
مش من حقك تحكم عليا و لا عليهم بأي حكم لمجرد أننا بنعمل حاجه أنت مش بتعملها
النقاب بيغطي وجهي مش بيغطي احساسي
الطرحة بتغطي شعري مش بتغطي عقلي
الهدوم اللي أنا لابساها دي مش بتعطل حاسة السمع و لا البصر و لا الشم و لا اللمس و لا بتعطل التفكير
اللي بيعطل الحواس و التفكير هو الإنسان ذات نفسه مش هدومه
اللي عايز يبقى متخلف هيبقى متخلف مهما لبس أو قلع
و اللي عايز يبقى متفوق و يخدم المجتمع هيبقى متفوق مهما لبس أو قلع
نماذج لمنتقبات
المنتقبة بتدرس و بتتفوق في دراستها
و بتتكرم عن اختراعاتها
و بتشتغل كاشيرة
و مصورة
و ممرضة
و صيدلانية
بتسوق
و تتفسح
و ممكن تجاهد في سبيل الله
و تتظاهر معبرة عن رأيها
و تحدف القنابل المسيلة للدموع مكان ما جت
عادي المنتقبة دي زميلتك و زميلتي
جارتك و جارتي
و ممكن تكون قريبتك من بعيد أو قريب
ماهياش كائن جي من المريخ
كل اللي هي مختلفة فيه عنك أن مفهوم الحشمة عندها مختلف عنك
و الإختلاف شئ عادي و مطلوب
بس في الأول و الأخر هي إنسان لا يقل كفاءة عنك
و تقدر تعمل اللي أي بنت تانية تعمله
النقاب في الأعمال الفنية
هل الإعلام له دور في رسم صورة مغلوطة عن الحجاب و النقاب؟
رانيا يوسف في مسلسل الحارة
فقيرة مقهورة ترتدي النقاب لتتمكن من التسول و بيع المناديل
هيفاء وهبي في دكان شحاته
ترتدي النقاب حتى تستطيع لقاء خطيبها السابق بعد أن أجبرها شقيقها على الزواج من شخص أخر
مي عز الدين في قضية صفية
ترتدي النقاب لتهرب من مستشفى الأمراض العقلية
مرجان أحمد مرجان
منتقبات يزغردن داخل المسجد و منهن الأخت المتزوجة عرفي
شيرين في هاللو أمريكا
تستخدم النقاب للنصب على الناس
فقيرة مقهورة ترتدي النقاب لتتمكن من التسول و بيع المناديل
ترتدي النقاب حتى تستطيع لقاء خطيبها السابق بعد أن أجبرها شقيقها على الزواج من شخص أخر
ترتدي النقاب لتهرب من مستشفى الأمراض العقلية
منتقبات يزغردن داخل المسجد و منهن الأخت المتزوجة عرفي
تستخدم النقاب للنصب على الناس
يسرا اللوزي في بالألوان الطبيعية
ترتدي النقاب بعد شعورها بالذنب لأنها اقامت علاقة جنسية محرمة مع زميلها
منة شلبي الأوله في الغرام
ترتدي
النقاب لتتخفي فيه و تتكلم مع البطل بطريقة بلهاء جداً وكأنها تحاول ان تقول ان
المنتقبة بلا عقل
ياسمين عبد العزيز في الثلاثة يشتغلونها
تربط بين الحجاب و الفظاظة و أن الالتزام هو تحريم كل شيء في الدنيا
مذكرات مراهقة
بنت مزورة تكذب على أهلها و تتخفى في النقاب لتستطيع طلوع رحلة مع زميلاتها من ورا اهلها
مسلسل الجماعة
منتقبة تعمل خادمة, شرشوحة حادة الطباع
شكراً للفن الهادف اللي رسخ صورة غير واقعية عن المنتقبات في أذهاننا
الشبهة #1
النقاب يعيق عملية التواصل بين المنتقبة و الناس
الرد:
عملية التواصل بين شخصين بتتم عن طريق 3 حاجات
الكلام
نبرة الصوت
لغة الجسد
لغة الجسد دي هي اللي تهمنا
و هي بتتكون من كذا حاجه
تعبيرات الوجه
حركة الرأس
لغة العيون
حركة اليدين
حركة و وضع الجسم
المنتقبة بتتواصل مع الناس عن طريق كلامها و نبرة صوتها و لغة الجسد زيها زي أي شخص, الحاجه الوحيدة اللي تنقصها هي تعبيرات الوجه
و دي مش قضية خالص
ليه؟
لأن المرأة المسلمة إنسانة عملية
بتخرج من بيتها لغرض معين
رايحة تشتري حاجه, رايحة الشغل, رايحة تزور حد, رايحة تنصر مظلوم
و هي بره البيت بتتعامل مع الكمسري, زميلها في الشغل, بياع, عسكري بتسأله على عنوان
بتعامل معاملة هات و خد
مش خارجة تتساير مع الناس و تهزر معاهم و توريهم النغزة اللي في خدها و هي بتبتسم
فطبقاً لطبيعة الناس اللي بتتعامل معاهم المنتقبة, النقاب لا يعيق التواصل
و جدير بالذكر ان المرأة مش بتلبس النقاب و هي قاعدة مع صاحباتها
أو اهلها
أو زوجها
و الثلاثة دول أهم ناس نحب نتواصل و نضحك معاهم
و جدير بالذكر أيضاً أن اللي بيجي يخطب واحدة منتقبة بيشوف وشها لأني ذهلت أن في ناس مسلمين و نصارى ما يعرفوش المعلومة دي و فاكرين أن الراجل بيتزوج الست من غير ما يشوفها
في حاجه اسمها الرؤية الشرعية و ده أمر من الرسول عليه الصلاة و السلام و اللي عايز يعرف أكثر عن الموضوع ده يدور و يقرأ اكتر براحته
طيب حد هيقولي المنتقبة ما ينفعش تبقى مدرسة
اقول له
لو مدرسة لأطفال مش لازم اصلاُ تغطي وجهها قدامهم
انما لو كبار اقولك اه ممكن ما تكونش مدرسة لغة بس ممكن تكون مدرسة أي مادة تانية لأن حركة الشفايف مهمة في تعليم اللغات بس ما اعتقدش انها مهمة في أي مادة تانية
الشبهة #2
المنتقبة محرومة من الشمس و الميه و الهواء و مش بتسرح شعرها
الرد:
المنتقبة بتلبس النقاب و هي بره البيت بس أو في مكان فيه رجالة
لكنها بتروح البسين و الشواطئ النسائية و بتلبس مايوه و تبلبط زيها زي أي حد
بتروح الجيم و بتنزل تمشي في أماكن عامة
و بتسرح شعرها و بتقصه و بتروح عند الكوافير و بتحط مونيكير و كل حاجه
النقاب لا يؤثر على الأنوثة و لا على الاستمتاع بالطبيعة
الشبهة رقم #3
النقاب مش فرض اصلا
الرد
أنا مش هجيب الشيخ فلان و لا علان عشان في ناس ما بتحبش تيارات معينة و بتعتبرهم متشددين
أنا هجيب كلام الأزهر و المفتي قبل ما يبقى مفتي
و اعتقد مفيش خلاف على الاتنين
فتوى الأزهر في النقاب
و علي جمعة قبل ما يبقى مفتي
أما بقى موضوع الإحرام و غض البصر و الجدالات دي هتلاقوا اجابتها هنا
http://www.islamqa.com/ar/ref/120379
http://www.islamqa.com/ar/ref/120377
و اللي عنده أي سؤال أو شبهة يبعت للموقع و هم هيردوا عليه
شبهة #4
الحجاب و النقاب سبب في نقس فيتامين د
الرد:
فيتامين د بينقص في الدم بسبب حاجتين- عدم التعرض للشمس
- عدم تناول أطعمة تحتوي على الفيتامين
عدم وجود شمس أصلاً زي الدول اللي في شمال الكرة الأرضية
أو الهروب من الشمس بسبب الخوف من سرطان الجلد و الاسمرار
أو بسبب قضاء النهار في مكان مغلق زي المكتب
أو تغطية الجسم بالملابس المحتشمة
طيب أنا كواحدة عايزه صحتي تبقى كويسة هعمل حاجتين
هاكل أكل صحي و هعرض نفسي للشمس
طيب أنا منتقبة أعرض نفسي للشمس ازاي؟
الغريبة ان الناس رابطة بين التعرض للشمس و المشي في الشارع معرفش ليه
هو مش ممكن اتعرض للشمس و أنا في البيت؟
أو و أنا قدام البسين في الوقت المخصص السيدات؟
هو فيتامين د مش موجود غير في الشارع؟؟
الشبهة #5
النقاب وسيلة للجريمة
الرد:
كم جريمة تمت في وضح النهار, خطف و سرقة و غش و بلطجةكم جريمة ارتكبها أكبر رجال في الدولة و محدش اتكلم عنهم
كم واحدة خانت زوجها دون أن يستعين عشيقها بالنقاب
كم واحد غش أمام أعين المراقبين اللي سايبينه عملاً بمبدأ اهم بيساعدوا بعض
كم واحد انتحل صفة طبيب و ضابط و ارتدى زيهم ليقوم بجريمته
هل الأزمة أزمة نقاب و لا أزمة اخلاق؟
هل استخدام النقاب في نسبة قليلة جداً من الجرائم تخلينا نسن قوانين لمنعه و كأن منع النقاب هيقضي على الجريمة في مصر؟
لو مشينا بهذا المنطق اللامنطقي ان استخدام زي معين في ارتكاب جرائم سبب لمنع ارتداء هذا الزي, فلنمنع ارتداء ضباط الشرطة لزيهم الموحد و لنمنع ارتداء الأطباء للبالطو الأبيض
المشكلة مشكلة اخلاق مش مشكلة لبس
و حوار النقاب و الجريمة ده ما هو إلا محاولة فاشلة لتنفير الناس من النقاب
الشبهة #6
المنتقبة بتشوفني و أنا مش بشوفها, من حقي أعرف مين اللي جنبي
الرد:
المسلم مش شخص فضولي, مش خارج من بيته عشان يتفرج على الناس و يفحص و يمحص فيهم, و لا يحشر مناخيره في شئون غيرهالواحد بيخرج في مهمة معينة زي ما قلنا قبل كده
و طالما أن مفيش تعامل قانوني بينك و بيني يبقى مش من حقك تعرف أنا مين
و ياريت كل واحد يخليه في حاله و يغض بصره
لو أنا داخلة الجامعة أو النادي أو المترو أو البنك أو أي مكان ملتزمة معاه بعقد مفيش ما يمنع ابداً إني اكشف وجهي ليتأكد المسئولون من هويتي
بس زي ما أنا حريصة على أمن المكان لازم القائمين على المكان يكونوا حريصين برضه على خصوصيتي
و مفيش أبسط من وجود امرأة أو شرطية تتأكد من هوية النساء المنتقبات
الشبهة #7
المهم الجوهر مش المظهر, في منتقبات اخلاقهم زبالة و في مش محجبات محترمين جداً
الرد:
أكيد الجوهر أهم من المظهر, بس المسألة مش اني مخيرة بين المظهر و الجوهرأنا مطالبة بتحسين جوهري و مظهري
الاتنين مع بعض
مش يا ده يا ده
كم هي نسبة المنتقبات اللي اخلاقهم زبالة؟
و كم نسبة الغير محتجبات اللي اخلاقهم راقية اوي؟
المنتقبة اللي اخلاقها مش كويسة مطالبة بأنها تلتزم بأخلاق الإسلام
و اللي مش محجبة و أخلاقها كويسة مطالبها أنها تلتزم بتغطية اللي ربنا أمرها بيه
ما ينفعش اقول أنا مؤمنة و مش طالبة غير رضا ربنا و أنا مش بنفذ أوامره
ما ينفعش أؤمن بجزء من تعاليم الإسلام و اسيب جزء
بس كده و لو افتكرت حاجه تاني هبقى ازودها إن شاء الله
